මේ මනරම් සන්ධ්‍යාවේ
මදක් මත්වූ හිතවතුනි
මේ කතා කරන්නට යන මාතෘකාව
අසා සිටින්නට නම්
ඔය මදිය - ඔබ තව ස්වල්පයක් මත් විය යුතුය !
මේ මනරම් සන්ධ්‍යාවේ
හුඟක් මත් වූ හිතවතුනි
මේ කතා කරන්නට යන මාතෘකාව
අසා සිටින්නට නම්
ඔබ මත් උනා ඇතිය - දැන් සිහි එළවා ගත යුතුය !
තනිකඩ අපිට ඉතින්
කතා කරන්නට කියා බොහෝ
බර පතල මාතෘකා වැඩිමනක් නැත
තිබෙනවා නම් එක්කෝ සල්ලි ය
ඒත් නැති නම් ඒ ප්‍රේමය හෝ අරක්කුය !
අරක්කු ගැන හැමදාම කතා වෙන නිසාත්
ප්‍රේමය අද මාතෘකාව කල යුතුමැයි
යටි හිත බෙරිහන් දෙන නිසාත්
මා මේ ප්‍රශ්ණය ඔබෙන් අහන්නම් !
හිතෝතුනි ඔබට
පළවෙනියටම වැදුනු ප්‍රේමය මතක ද?
ඒ ගැන මතක් වෙන විට
තවමත් පපුව හයියෙන් ගැහෙනව ද ?
සමනල්ලු පියාඹන හැඟීම
එදා වාගෙම නැතක් ලාවට හරි දැනෙනව ද?
එසේනම් මිත්‍රයා
අපි එක බෝට්ටුවේ !
හැන්දෑවක ඉර බැහැ ගෙන යන මූදු වෙරළක
අඩියක් ගහන ගමන් අපි
ඔය ගැන කතා කරමු !
පළමු ප්‍රේමය හෝ
ඊට පස්සෙ තිබූ එකසිය විසි පස්වන ප්‍රේමයත්
මතක් වෙන විට තවමත්
පපුව හයියෙන් රිදෙනව ද
නහර පලා ගෙන රුධිරය
නටන හැඟීමක් - වෛරයක් දැනෙනවද ?
එසේනම් මිත්‍රයා
අපි එක බෝට්ටුවේ !
හැන්දෑවක කවුරුත්ම නැති පාළු බාර් එකක
අඩියක් ගහන ගමන් අපි
ඔය ගැන කතා කරමු !
තිලංක තේනුවර
ජනවාරි 10, 2024
මූදු වෙරළක - පාළු බාර් එකක
No comments:
Post a Comment