කියවන්න එපා ! සෑහෙන්න දිගයි !!!
මේ රාත්‍රිය බොහෝ මත් වෙන සුළු නිසා
රාත්‍රියට වැඩි වීමට පෙර
මං මේ කවිය ලියා තබන්නම් !
දැන් මා සිටින්නේ
චන්ද්‍ර මණ්ඩලයට ස්වල්පයක් පහලින්
අල්පයක් අඳුරෙන් ආලෝකමත් උනු
ත්‍රී පීස් සංගීතයෙන් රෝමාන්තික කරන ලද
පාළු මුත් සෙනග අඩු නැති
තැබෑරුමක වහලයෙයි !
හඳේ හාවාට කන්නට
කැරට් පාත්තියක් වගා කල යුතුමයි කියා
චන්ද්‍ර කුමාර සමග කල වාග් සංග්‍රාමය
ජය පැරදුමකින් තොරව අවසන් වූ නිසා,
බොහෝ සෙයින් උරණ වූ
අජටාකාශ ගාමී තරුණ මහතෙකු
හඳට පාඩමක් උගන්නන්නට කියා
මූව අද කළුවරේ තියන්නෝනැයී පවසා
කිහිප වරක්ම උත්සාහ කර දුර ඇමතුමක් ගෙන
තාරකා මණ්ඩලයේම විදුලිය
වහා කපා දැමිය යුතු බවට
විදුලි බල මණ්ඩලයට ගර්ජනා කරයී !
දැන් වේලාව පාන්දර දෙකයි නැති නම් තුනයි
වේලාව ගැන නිච්චියක් නැති උනත්
රාත්‍රිය තාම තරුණ බව නම්
හොඳටෝම විස්වාසයි !
දිස්නෙ ගහනා තාරකාවියක්
සිතිජය දිගේ මතුවී පැමිණ ළඟට
සිකැරට්ටුවක් දල්වා ගැනීමට
ගින්දර ටිකක් ඉල්ලයි !
එකොළහේ මේසයේ අසුන් ගත්
පිංවන්ත මැදි වියේ මහතෙකු
බොහෝ අභිමානයෙන් යුතුව
ගිනි ගලක් සහිත කලැසික් ලයිටරයක්
පමාවකින් තොරවම ඈට දික් කරයි !
මේ රාත්‍රිය හරි පෙම් බරයි
ඇල්කොහොල් මිශ්‍ර වූ කල
කතන්දර උනත් හරිම රස බරයි
ඒ ඉතින් හැබැයි පරණ ප්‍රේමය
මාතෘකාවක් නොවෙන තාක්කල් විතරමයි !
තිලංක තේනුවර
ජනවාරි 04 බ්‍රහස්පතින්දා , 2024
තැබෑරුමක වහලෙ උඩ.
No comments:
Post a Comment