කිචි බිචි සහ බණ්ඩාගේ ඇනිවසරිය...

කටුක කර්කශ දිවිය කතරකි
බොහෝ කරදර දුක් සුසුම් ඇති
තබන හැම පියවරක මගෙ සකි
සෙවනැල්ල මෙන් හිටියොතින් ඇති...

චණ්ඩ හිරු රැස් ගෙනෙන දාහය
නිවාලන මුදු සුළං කෝඩෙකි
මිලින මල් ගොමු පුබුදුවාලන
පවස නිවනා අමා වැස්සකි
යනෙන මග නිති සුවය සදනා
සේද සුසිනිදු සුමුදු පළසකි
ප්‍රේමයෙන් ජීවිතය පුරවපු
මගේ හිමි සමුදුරකි අහසකි...

හැමදාම මේ ලෙසින් මගෙ ලඟින් ඉන්න
සසර වෙන් වෙන තුරුම එකම මග යන්න
මගෙ හුස්ම මගේ පණ මගේ පෙම අහන්න
කිසි දිනෙක එපා මේ දැත් අත හරින්න...

සුබ විවාහ සංවත්සරයක්!!!

කොහේ දිවුවද මන්දා , සින්ඩරෙල්ලා...

සාදෙ මැද්දට පැනලා
හොඳට නට නට ඉඳලා
සපත්තුවකුත් තියලා කලබලේ
කොහේ දිවුවද මන්දා , සින්ඩරෙල්ලා...

ඒක උල් සපත්තුවක්
හිල් කරන්නට සමත් හදවත් 
නැටුම අතරේ නිල් වෙන්න පෑගුනත් කකුල
කුමාරයට කොහෙ දැනෙන්නද බං වේදනාවක්...

දොළහේ කණිසමෙ සද්දෙ අස්සේ
මධු බිඳේ - ප්‍රේමාලිංගන සැරදේ - බඳුන් ඉස්සේ
දෙනෝ දාහක ඇස් ඉදිරිපිට - හොරාටම
කුමාරිය මණ්ඩපෙන් බැස්සේ...

හතර දිග් බාගෙම අණ බෙරින් වරුසා
යවනු බෑ කුමරියට නැගෙයී අපහාසා
ගෙවල් අහවර කොට - තව ගුබ්බෑයම් අස්සෙත් රිංගා
හොයා හෙම්බත්ව - කුමරා, සොවින් පසු බැස්සා...

සාදෙ මැද්දට පැනලා
බාල් නැටුමුත් නටලා
සපත්තුවක් විතරක්ම තියලා
කොහෙද බං ගියේ, කියාපන් සින්ඩරෙල්ලා...

-තිලංක තේනුවර-

අගෝස්තු 26, 2022
ලයිට් කණුවක් යට - ටවුන් හෝල්.

දරුණුවට පෙම් කරලා අත හරින එකම පාපයක්...

දරුණුවට පෙම් කරලා

අත හරින එකම පාපයක්

දන්නවද ප්‍රේමිය

ප්‍රේමය කියන්නෙත්

එක්තරා විදියක සාපයක්...

දුටුව පලවෙනි දවසෙදිම

ආදරෙන් බැඳුන එකත් පුදුමයක්

අමතකද සොඳුරිය

අපේ පෙම් කෙරුවාව

ලෝකෙටම ඒ දවස්වල පිස්සුවක්...

හමුවීම් සියල්ලට උරුම හිමිවීම නම්

කොහෙද බං ඒකෙ ලස්සනක්

ප්‍රේමයෙන් සන්නද්ධ උන් ලඟ

වෙන් වීමකදි උවත් කිසිවිට

තිබුනෙ නැහැ  ප්‍රියාවියෙ වෛරයක්...

-තිලංක තේනුවර-

අගෝස්තු 24, 2022

දියත, ජපන් පාලම උඩදී.

මේ වැහි බර රාත්‍රියේ ඔබට යමක් පවසන්නට සිතමි...

මේ වැහි බර රාත්‍රියේ
ඔබට යමක් පවසන්නට සිතමි
සඳ පමා කල යුතුය අද අහසට
කොයි තරම් දරුණු ලෙස තුවාල වූවත්
රළු පිරිමි පපු විවර වන්නේ
ගණ කළුවරකදී පමණි...

අහා... කළුවර...
මේ තරම් උග්‍ර රොමාන්තික බවක්
උඹ කොහෙන් හොරකම් කර ගත්තා දැයි නොදනිමි
කෝපි නැති මේ සීතල රාත්‍රිය
බීර වීදුරුවක ගිල්වමුද ?
කතාව අහන්නට පැමිණි සගයනි...

"ඈ මා හැරදා ගියා..."
බොහෝ සිත් බිඳ ගත් ප්‍රේමවන්තයින්
ශෝකාලාපයන් අවසන් කෙරූයේ එතැනිනි 
එහෙත් මෙය පැහැදිලිව කීමට කැමැත්තෙමි
මේ කතා බහ අපි අද
ආරම්භ කල යුත්තේම එතැනිනි...

දුම් වැටියක් වට දෙක තුනක් කැරකැවී
දුම් රොටු දීසියට පත බෑ වුනි
ලයිට් එළියට පොර කෑ මෙරු දෙතුන් දෙනෙක්
පිළිස්සී මිය යන අයුරු දුටු සූතිකා බල්බ
ශෝකය ප්‍රකාශ කරමින් කිහිපවරක් ගැස්සුනි
ඈතින් ලංතෑරුමක් මේ අස්සේ සිනා සෙනවා දුටිමි...

කොහොමින් කොහොම හරි
මම නැවතත් පැවසීමට කැමැත්තෙමි
මේ කතා බහ අපි අද
ආරම්භ කල යුත්තේම එතැනිනි...
බීර වීදුරුවක් තව හලා ගමු නේද
කතාව අහන්නට පැමිණි සගයනි...

නමක් ගමක් නොදන්නා තාරුකාවක්
හිටි වනම අහසින් බිමට පනිනවා පෙනුනි
ඉශ්ඨවෙයී, ප්‍රාර්ථනාවක් කරමුද?
කතාව අහන්නට පැමිණි සගයනි
මම නැවත නැවතත් කියමි
මේ කතාව ආරම්භ කල යුතුව තිබුනේ එතැනිනි...

-තිලංක තේනුවර -
අගෝස්තු 21, 2022

අඩුවකට හිටියෙ ඔයා විතරමයී...

කුඩු වෙන්න වැදුනු රෑක
ඩිම් වෙච්චි තාරකා එළි ඔස්සේ
ලයිට් කණු වල වාරුවෙන් මා
ඇල්බට් චන්ද්‍රවංකය දෙසට ආවා...

නිතර තිස් අට බස් එහා මෙහා යන
බිහිසුණු හයිලෙවල් මාවත 
අද නම් යාය පිටින් පාළුයී
කොහෙන්දෝ මන්දා ගහගෙන ආපු
රෑ කුමාරි මල් සුවඳ පෙනහළු තදින් මිරිකයී...

සුදු වතින් හැඩ උනු
කෞතුකාගාරෙ නම් රෑට හරි ගුප්තයී
මෙලෝ ප්‍රාණියෙක් නැති 
ග්ලාස් හවූස් හෝල්ට් එක ලඟ
තිබුනෙ හිස්කම විතරමයී...

හඳ නම් පායලා තිබුනෙ එදා වාගෙම
ටංග්ස්ටන් කහ පැහැය හරි ලස්සනයී
මේ අල්ල පනල්ලෙ අනූ නමයක් එද්දි
අඩුවකට හිටියෙ ඔයා විතරමයී...

තිලංක තේනුවර
අගෝස්තු 17, 2022
අනූ නමයක පාපුවරුවේදී

අකාලික ප්‍රේමයෙන් හෑරුණු මතක දෝනා තව ම දනවා...

බොහෝ ප්‍රේමය එකතු වූ පසු
පිපිර යන්නට ඉඩැති හින්දා
මහා කිරීටක ධමනියෙන් මං
ආදරේ බයි පාස් කෙරුවා...

වෙන දා මෙන් වේගයෙන් නැති මුත්
තාම ප්‍රේමය පොම්ප වෙනවා
නහර අස්සෙන් ආයෙ පෙරි පෙරි
ආත්මය අවුලවා යනවා...

දරුණු ලෙස ආදරේ කළ හිත්
ගැඹුරු ලෙස හෑරිලා යනවා
පාළු උනමුත් ප්‍රේම නටඹුන්
බිහිසුණුයි වේදනා දෙනවා...

නික්ම ගිය පසුවෙනුත් සොඳුරිය
හිස් ම හිස් තැන් හුඟක් තියලා
අකාලික ප්‍රේමයෙන් හෑරුණු
මතක දෝනා තව ම දනවා...