සඳ හා බොහෝසෙයින් උරණ වූ තරුවක් අහසින් බිමට පැන සිය දිවි නසා ගැනීමට ප්‍රථම සිය ඥාති හිත මිත්‍රාදීන් අමතා එවූ ලිපියක මෙහෙම තිබුණා.
වයස යාන්තමට
අවුරුදු බිලියන දෙකයි දවසයි
එළිය විහිදද් දි කිරණින්
ඇන්ඩ්‍රොමීඩා පවා බැබළෙයි
ඔරායන් ගේ දුන්නෙ ඊතල
යොමු උනත් කුමරියන් හත වෙත
සීරුවට බැලුවොතින් ඇස් දෙස
නුඹ දකියී මේ මාව කෙළවර
ඉතිං හිතවත
කාරණේ දැන් ඔන්න ඔහොමයි
තරුණ තාරකාවියකට
යෝජනා නම් මෙහේ එමටයි
සඳත් ඒ දවස් වල
හැමදාම වගේ අපේ ගේ දොරකොඩ
දුකත් හිතෙනවා ඉතිං
පවු එයත් එක වෙලාවකට
ආදරේ හින්දනෙ
මේ තරම් මං වෙනුවෙන්ම නහින්නෙ
බේරෙන්න බැරිම තැන අන්තිමට
දුන්න මං කැමැත්ත චන්ද්‍ර කුමාරට
බලන්න එපැයි හඳේ සතුට
මුලදිම මං දැම්ම නීතිය
වහාම දක්කන්නෝන ඔය ගෙදර හාව කූඩුවට
මොකද හාවොන්ගෙ බූල් වලට
තරුවක් උනත්
ලෙඩ වෙන්න පුළුවන්නෙ ආයිබෝවන්ඩ
ආවාට එක දෙකක් තිවුණට මොකෝ
ඒවට කොහෙ වැහෙන්න ද ඒ මූණෙ ලස්සන
බලන්නෙපැයි පුර පෝය දවසට
උපමා රූපක කොහෙද ඒ සිරියාවට
ඒ විතරක් ද
පුදුම සනීපයක්නෙ තියෙන්නෙ ඒ එළියෙ උණුහුම
කාලයක් ගත වෙද්දි ටික ටික
වට පිටේ කසු කුසුව හින්දම
හොයා බැලුවම දිනක් රෑ මැද
සුදු වළාකුලක් ළග කුලී තානායමක
මෙන්න මූ ඉන්නවා
තව ගෑණු හත අටක් එක්කම
තරුපති තරුපති කියාගෙන
නාඹර තරු කැකුලියො ආවට හොයාගෙන
කවුද දෙයියනෙ හිතුවෙ මේ වග
සලෙළ බඹරෙක් කියා මගෙ සඳ
තාරකාවියක හදවත
කෑලි වෙන්නම කැඩුණම
දන්නවද හිතවත
සුපර් නෝවා පරාදයි පිපිරුම
ඒ ලෙසින් වේදනා විඳ පිපුරුනහම
කළු කුහරයක් ලෙසින් අහසේ
රැඳෙන්නට වෙනවලු සදාකාලිකවම
එකදු ආලෝක අංශුවක්වත් අත නොහැර ගිලිමින්
එහෙම වෙනවට හොදයි මිතුරනි
වෛරයෙන් මා පුපුරන්ට පෙර
පනිමි අහසින් හනික පොළවට
අනේ වරදක් උනේ නම් මට
සමාවෙනු ආදරෙයි උඹලට
එසේ පවසා තාරකාවිය
වේදනා උහුලන්න බැරි තැන
කදුළු උල්පත් වහා හිස් කොට
ක්ෂිතිජේ ඔස්සෙම බිමට පැන්නා
බිමට වැටෙනා ඈව දුටු කල
භූමි වාසී හුදී ජනයා
අන්න තරුවක් කියා මොරගා
දෑස් පියමින් දෑත් එක්කොට
උන්ගෙ අරමුණු සඵල වෙන්නට
මියෙන තරුවෙන් හීන යැද්දා
No comments:
Post a Comment