ඉඩෝරෙත් මල් පිපුණේ
පතොක් වල විතරය
අවාරෙත් ලඟ හිටියේ
කැලෑ මල් පමණය !
අමාවක දුක දන්නේ
චන්ද්‍රයා විතරය
සාගරේ ඉම දන්නේ
සාගරේ පමණය !
ආදරේ ගැන දන්නේ
සොඳුර නුඹ විතරද ?
විරහවේ දුක දැනුනේ
ඉතින් මට විතරද?
තිලංක තේනුවර
ජූලි 27 ඉරිදා , 2025
Sunday, July 27, 2025
පෙමක් හම්බුණු දිනෙක වරක් මට පවසන්න !
මට හැකිය ආකහේ ඔබ හොයන සඳ වෙන්න
ඇවිලෙද්දි වැස්සක්ව නිවා හිත සනහන්න
සීතල සුළඟක්ව ඉඩෝරෙත් දැවටෙන්න
කළුවරම දවස් වල තරුවක්ව ලඟ ඉන්න !
ඔබ කියන මොහොතකදි නිහඬවම බැස යන්න...
පෙමක් හම්බුණු දිනෙක වරක් මට පවසන්න !
තිලංක තේනුවර
ජූලි 26 සෙනසුරාදා , 2025
Thursday, May 8, 2025
ඔවූ මේ කවිය ලිවූවෙ ඔබට !
රෑ අහසේ තදට දිලිසෙන
ඔබ වතාවක් ලස්සනැයි කියූ
ඒ තාරකාව ගලවා
ඔබේ දෝතින් තබන්නෙමි යැයි
නිශ්ඵල කතා කීමට මට බැරිය !
ක්ශීරපතයේ චායාරූපයක් දැක
විශ්මාන්විතව ඒ දෙස බලා සිටින
ඔබේ හිස මෘදුව අතගා
මේ විශ්වයම හකුලා
ඔබේ දෝතින් තබන්නෙමි යැයි
නිශ්ඵල වදන් දීමට මට බැරිය !
නමුත් ඔබ කැමැති නම්
තාරකා තරම් දීප්තිමත් නැති මුත්
සාගරය තරම් ගැඹුරු මේ ඇස්
ගලවා තැබිය හැක
ඔබේ චන්ද්‍ර මණ්ඩලය මත !
විශ්වය තරම් විශාල නැති මුත්
මහමෙරක් තරමට බර
මගේ හිස තබන්නම්
ඔබෙ දෝත මත - ජීවිත කාලයටම
ප්‍රේමිය එයයි මට දිය හැකි
නිශ්චිතම පොරොන්දු ව !!!
තිලංක තේනුවර
මැයි 8, බ්‍රහස්පතින්දා 2025
Monday, March 24, 2025
මම හයියෙන් කෑගහල කිවූවා පැලෙන්න ආදරේ බව උඹට, අහසට !
දරා ගන්න බැරිම වෙච්චි දවසක
තරමක් මධුවිතෙන් සන්නද්ධ හවසක
මම හයියෙන් කෑගහල කිවූවා
පැලෙන්න ආදරේ බව උඹට, අහසට !
හඳත් ඇබ්සන්ට් මොහොතක
චක්‍රාවාටයේම තාරුකා අතරින්
ප්‍රොක්සිමා සෙන්චූරි විතරයි එදා
අහන්නට හිටියෙ මගෙ දුක !
මා උඹට ආදරේ බව
මේ සක්වලින්ම දන්නේ
ප්‍රොක්සිමා සෙන්චූරි හැරුනම
ෆේස් බුක් හිස්ට්‍රි එක විතරය !
තිලංක තේනුවර
මාර්තු 23 , ඉරිදා 2025
Saturday, March 22, 2025
කලාතුරකින් ලැබෙන ඔබේ දුර ඇමතුම් !
එක වරම
නොස්ටැල්ජියාවක මිහිරෙන්
මා සන්තර්පනය කර
තවත් මොහොතකින්
ඒක පාර්ශවික ප්‍රේමයක
අසීමාන්තික වේදනාවකින්
ගෙල මිරිකා මා පොළවේ ගසන
කලාතුරකින් ලැබෙන
ඔබේ දුර ඇමතුම්
ආශිර්වාදයකට වඩා
දැන් නම් සාපයක් !
ඒ ඔක්කොටම වඩා කරුමෙ
හරියටම වැඩ ඉවර වෙලා
ගෙදර යන්න එළි බහිද්දි
අහේතුකවම ඔළුවට කඩා පැනපු
මේ අනාරාධිත වැස්ස !!!
තිලංක තේනුවර
මාර්තු 21 සිකුරාදා, 2025
වැස්සක, කොළඹ අස්සක !
Saturday, January 18, 2025
මා ලියන පොතේ ඔබට පිටුවක් වෙන් කරමි !
මා ලියන පොතේ
ඔබට පිටුවක් වෙන් කරමි !
ඒ පිටුව පුරාවට
ඔබව පැන්සලකින් පින්තාරු කොට
මිනිරන් පැහැයෙන් දිස්නෙ දෙන
ඔබ දිහා මොහොතකට බලා හිඳිමි !
අතීතයක බර
දිගු සුසුමකින් බිමට අත හරිමි !
පිටුව උඩින් හෙඩිමට
ලියා ගත නොහැකි වූ
කවිය යැයි නම් දෙමි !
දැන් මා
ඊළඟ පිටුවට
කවියක් සොයමි !
තිලංක තේනුවර
ජනවාරි 17 සිකුරාදා , 2025
Subscribe to:
Posts (Atom)