ඉතිං ආයුබෝවන්, අධි සාන්ද්‍ර ප්‍රේමය !!!

ඈ මා ඉදිරිපිට ම
මා සිත ඩැහැගත් අධිමාත්‍රික හුරතලය
වෙන කෙකුගේ උරහිසෙහි එල්ලී
ප්‍රගුණ කළා ය
මට වඩා
සිය දහස් ගුණයක් වැඩියෙන්...

මොනව කරන්න ද කරුමෙට
ඒ හුරතලය දැක දැක
සිය දහස් ගුණයක් වැඩියෙන්
නැවත ත් බැඳුනි මේ සිත
ඈ කෙරෙහි
අප්‍රමාණික ප්‍රේමයෙන්...

ඒ චැප්ටරය නිමි - ඔබට සුබ පතමි
දැක්කොත් කියවන්න, පසුව මේ ටික ලියා තබමි!

ඉතින් ප්‍රියාවිය
ඔබ දැන ගත යුතු ය
අධිමාත්‍රික හුරතලය
එකල්හි සුන්දර මුත්
මෙකල්හි බොහෝ කටුක ය
එකල්හි ඖෂධ මුත්
මෙකල්හි හලාහල විස ය...

ඒ නිසා කරුණාකර
නැවත මා ඉදිරියට නො එන්න!!!

කිසිදා වෛර කළ නොහැකි
ඔබ ඉදිරියේදී නැවත ත්
ප්‍රේමය පුපුරා යාවි දෝ සැකයි
සිත ඇද බැඳ තබාගෙන සිටින
බර යදම් දියවී
හනි හනික දුව විත්
ඔබව බදා ගැනීමට සිතේවිදෝ බය යි...

ඒ නිසාවෙන් ඈතින් සිටින්න
මිලිමීටරයක්වත් අත නොහැර
ප්‍රේමය ම පෙර පෙරා ගොඩ ගහපු පිරිමි පපු
සුළු උත්ප්‍රේරණයකදී උව
වහා උත්ප්‍රාසයෙන් ඇවිලෙන සුළු යි...

-තිලංක තේනුවර-

දෙනෝ දාහක් එක්ක කන්දත් අනේ අවසන් සුසුම් හෙළුවා...

අහස විද සුර ලොවේ සාරය
උරා පොළොවට පොම්ප කරමින්
උසට විහිදුනු මහා කදු වෙති
තැනි තලා පෝශණය කරමින්...

දියැලි ගංගා උපද්දාලා
යවයී පහලට රනින් සරසා
කන්දෙ සාරයෙ පිහිට ගන්නට
නේක ජීවින් එහිම ලැග්ගා...

විහිද දඩු මුල් කන්ද ඇතුලට
පසත් එක්කම උරා කෑවා
මහා තුරු ගොමු ලෙසින් වෙස් ගත්
පිසාචයො එහි අරක් ගත්තා...

අනෝරාවක් වැටුන දවසක
කන්ද මැද්දෙන් දෙපළු වූවා
දෙනෝ දාහක් එක්ක කන්දත්
අනේ අවසන් සුසුම් හෙළුවා...

මැරුණු ජීවිත වල වැරැද්දත්
නිහඩ උනු කන්දටම පවරා
ශේෂ උනු පස් ටිකත් හූරන්
පිසාචයො ඒ නඩුව වැහුවා...