මා ආදරය කල ගැහැණුන්
එපමණක් සිටියද
මට ආදරේ කල ගැහැණුන්
සිටියේ අතලොස්සකි !
මා ස්නේහ වැඩූ ගැහැණුනි
ඔබට මා කෙතරම් ප්‍රේම කලාද ?
ඇවැසි සෑම මොහොතකම
උවැසි අත වැසි සේ මම
කඳුළු පිස දා ලන
කඩදාසියක් විය අවසන
කුනු කූඩයට විසි උන !
වරදක් නැත
මා ඔබට ප්‍රේම කෙරූ බව
කිසිදා ප්‍රකාශ කර නැත
ඒ නිසා මේ කැපකිරීම් සියල්ලම
මිත්‍රත්වයේ වේශයෙන්
ඔබේ ජීවන ඩයරියේ
සමහර විටක ලියවී තිබෙන්නට හැක !
මට ප්‍රේම කල ගැහැණුනි
මට ඇති එකම දුක
ඔබ මට ප්‍රේම කල බව නොකීමය
නොකීවත්
එය තේරුම් ගන්ට බැරි වීමට
පෙරලා ප්‍රේම කරන්නට
නොහැකි වීමය
ඒ ප්‍රේම ණය ගෙවන්නට
තරම් තව ප්‍රේමයක්
මා තුල ඉතිරි නොවීමය !
මේ දැනෙන ණය ගැති හැඟීමට
කුමක් කරන්නට දැයි මා නොදනිමි
ඒක පාර්ශවික ප්‍රේම රාජධානියක
සිංහාසනාරූඪව මා නිදමි !!!
තිලංක තේනුවර
ඔක්තෝබර් 5 සෙනසුරාදා, 2024
