මිරිකලා දෙහි බෑය ලුණුත් එක්කම
අයිස් කැට දෙක තුනක් දාල ගත්තම
ජින් සහ ටොනික් කියන්නෙම
පානෙකි පිරිමි හිත් අවුලන්න සමර්ථම !
වට දෙක තුනක් අධිවේගයෙන්
කැර කැවී දුම්වැටියක් සර්පිලාකාරව
අත හැරුනු පසු දුම් රොටු දීසියට
ෆිල්ටර් කොටය අසයි - තාමත් මදිද ඔහෙල ට !
හිතෝතුනි රාත්‍රිය දිගු බව ඇත්තයි
කතා කරන්නත් දේවල් නම් බොහොමයි
පදම දැන සීරුවට ගත්තහම
ඇල්කොහොල් උනත් හිතට හරි සනීපයි !
ඔබත් ඉන්නේ තිතට මත් වී නම්
මදක් ඉස්සී ජනේලයෙන් බැලුවොත්
පෙනේවි ඔබට අද අහස
තාරුකා දහසකින් සන්නද්ධයි !
ඒ අතර වඩාත් හොඳින් දිලිහෙන
ප්‍රොක්සිමා සෙන්චූරි දෙස අතවනා
පණිවිඩයක් තියේ නම් කිවුවොත් මේ වෙලේ
මා වෙත එය ළඟාවෙනවා සත්තයි !
ඔවූ ප්‍රේමිය
උඹටත් එය අදාලයි !
තිලංක තේනුවර
තාමත් තරුණ රාත්‍රියක
20.06.2024
