මහා විස්ථාරයකින් යුතුව සිය තරංග ආයාමය ඔස්සේ ගබඩා කරගත් ප්‍රේමය රළක් වෙරළට නිදහස් කරන්නේ මහත් ආවේගයෙනි. එකී ප්‍රේම ප්‍රකාශන ක්‍රියාවලියේදී වෙරළේ සමහර තැන් වල ඉතා ගැඹුරු කුහර පවා ඇතිවේ. මුහුද නම් කියන්නේ මේවා ප්‍රේම හුඹස් කියාය. නමුත් මේ ගැන වෙරළ නිහඬය.
වෙරළේ නිශ්ශබ්ධතාවය පිටතින් බලා හිඳින්නෙකුට ඒත්තු ගන්වන්නේ මුහුද නිරන්තුරුවම වෙරළට අඩත්තේට්ටම් කරන බවක් සහ වෙරළ මුහුදේ කෲරත්වය හමුවේ අගතියට පත්වී ඇති බවකි.
යථෝක්ත සිද්ධි දාමය වසර සිය ගණනක් තිස්සේ බලා සිටි කැස්බෑවෙක් පසු ගිය දවසක මේ දීර්ඝ කාලීන පැණයට පිළිතුරක් ලියා එවා තිබුනා. එය පහත පරිදිය...
රළ - වෙරළ - මුහුද සහ ප්ලේටෝනික ප්‍රේමය...
එකම රළකට දෙපාරක් බැහැ
වෙරළෙ උණුසුම විදින්න
ඒ නිසාවෙන් උන් හදන්නේ
හැකි තරම් කල් රැඳෙන්න...
ඇදෙන තරමට ටිකක් ඈතට
ගෙවෙන කාලය වැඩියි වෙරළක
විසිර දහසක් පෙණ බිදිති ලෙස
රළක් ඇහිඳියි තවත් ප්‍රේමය...
කාලෙ හරි සීමිතයී ඇත්තයී
ඒත් මේ පෙම නන්දනීයයී
චාරිකාවේ මතක සේරොම
නැවත මහ සමුදුරට බාරයී...
එකට හමුවී ඉන්න බැරි තැන
දහසකුත් රළ පෝශණය කර
විඩින් විඩ අත හරී වෙරළට
අසා සැප දුක් උඹට කොහොමද...
ටිකක් හයියෙන් ඇවිත් හැපුනට
මදක් ගැඹුරට කුහර හැදුවට
උඹේ ප්‍රේමය වේදනාවක්
කියූ වෙරළක් තියෙද මුහුදට...
නිමි.
කැස්බෑ ලියුම පරිවර්ථනය කරේ,
තිලංක තේනුවර
නොවැම්බර් 30, 2022
ප.ලි - පොටෝ එක පේස් බුක් එකෙන්. මේ ලියවිල්ලෙයී පොටෝ එකෙයි උක්ත ආඛ්‍යාත ගැලපීමට උත්සාහ කිරීමෙන් වළකින්න.
ප.ලි 2 - මේ ඉන්නෙ කැස්බෑව කියල හිතන්නත් එපා.
